bazm-e-dushman mein bulaate ho....

bazm-e-dushman mein bulaate ho ye kyaa karate ho

bazm-e-dushman mein bulaate ho ye kyaa karate ho
aur phir aankh churaate ho ye kyaa karate ho

baad mere koii mujh saa na milegaa tum ko
Khaak mein kis ko milaate ho ye kyaa karate ho

chiinTe paanii ke na lo niind bharii aaNkhon par
sotay fitanay ko jagaate ho ye kyaa karate ho

ham to dete nahiin kyaa ye bhii zabar dastii hai
chhiin kar dil liye jaate ho ye kyaa karate ho

hon na jaaye kahiin daaman kaa churaanaa mushkil
mujh ko diiwaanaa banaate ho ye kyaa karate ho