toot gaya....

apnay bistar pe bohat der se main neem daraz,
sochti thi k woh is waqt kahan per hoga,
main yahan hoon magar uss koocha-e-rang o boo main,
roz ki tarah se woh aj bhe aya hoga,
aur jab uss ne wahan mujhko na paya hoga!
apko ilm hai’ who aj nahi ayi hain?
meri har dost se uss ne yahi poocha hoga,
kyun nahi ayi woh, kia bat hui hai akhir,
khud se is bat pe so bar woh uljha hoga,
kal woh ayegi to main uss se nahi boloon ga,
ap he ap kayi bar woh rootha hoga,
woh nahi hai to bulandi ka safar kitna katthin hai,
seerhian charhtay huay uss ne yeh socha hoga,
rahdari main’ haray lawn main’ phoolon k kareeb,
uss ne har samt mujhe aan k dhoondha hoga,
naam bhoolay se jo mera kahin aya hoga,
ghair mehsoos tarikay se woh chonka hoga,
ek jumlay ko kayi bar sunaya hoga,
bat kartay huay so bar woh bhoola hoga,
yeh jo larki nayi ayi hai’ kahin woh to nahi,
uss ne har chehra yahi soch k dekha hoga,
jan-e-mehfil hai’ magar aj’ fakat mere bagher,
haye kis darja wahi bazm main tanha hoga,
kabhi sannaton se wehshat jo hui hogi usay,
uss ne bay-sakhta phir mujhko pukara hoga,
chaltay chaltay koi maanoos si ahat pa kar,
doston ko bhe kisi uzar se roka hoga,
yad kar ke mujhe’ nam ho gayi hongi palkain,
“ankh main par gaya kuch” keh k yeh tala hoga,
aur ghabra ke kitabon main jo li hogi panah,
har satar main mera chehra ubhar aya hoga,
jab mili hogi usay meri alalat ki khabar,
uss ne ahista se deewar ko thama hoga,
soch kar yeh’ k behel jaye pareshani-e-dil,
yunhi bay-wajah’ kisi shakhs ko roka hoga!
ittifaqan mujhe uss sham meri dost mili,
main ne poocha k sunu – aye thay woh? kese thay?
mujhko poocha tha? mujhe dhoonda tha charon janib?
uss ne ek lamhe ko dekha mujhe aur phir hans di,
uss hansi main to who talkhi thi k uss se agay,
kia kaha uss ne – mujhe yad nahi hai, lekin,
itna maloom hai’ khwabon ka bharam toot gaya!!!