talaash karti thi

Gali main dard k purzay talaash karti thi
Mere khatoot k tukre talaash karti thi


Bhulaye kon Aziyat Pasandiyan us ki
Khushi k dhhair main sadmay talaash karti thi


Ajab hijar parasti thi uski fitrat main
Shajar k toote pattay talaash karti thi


Ghuma phira k judayi ki baat karti thi
Humesha hijar k harbay talaash karti thi


Duayen karti thi ujre howye mazarOn par
Bare ajeeb sahaaray talaash karti thi


Mujhe to aaj bataya hai badlOn ne
Wo laut aane k raaste talaash karti thi