Yaad aaye hain

jab bhee kisee nigaah ne mausam sajaaye hain
tere labon ke phool bahut yaad aaye hain

nikley jab safar pe to mahdood thaa jahaan
teri talaash ne kayee aalam dikhaaye hain

rishton kaa aitibaar, vafaaon kaa intizaar
ham bhee chiraagh le ke havaaon mein aaye hain

raston ke naam waqt ke chehray badal gaye
ab kyaa bataayein kisko kahaan chorh aaye hain

ai shaam ke farishto zaraa dekh ke chalo
bachon ne saahilon pe gharonde banaaye hain

Poet: Nida Faazli