Ye baat samajh main aai nahi "
Ye baat samajh main aai nahi, Aur Ammi ney samjhai nahi
Main kaisay meethi baat karoon? Jab meethi cheez khai nahi
>>
Aapi bhi pakaati hain Halwa, Woh aakhir kiyon 'Halwaai' nahi?
Bhayya ki mangni ho gai kal, Kiyoon kal hi 'Dulhan' mangwaai nahi?
Ye baat samajh main aai nahi
>>
Naani ke miyaan jab Nana hain, Dadi ke miyaan jab Dada hain......
Tab Aapi se main ne poocha ..Baaji ke miyaan kiya 'Baaja' hain?
Woh huns huns kar yoo kehnay lagi, A bhai nahi yeh baat nahi
Ye baat samajh main aaai nahi
>>
Jab naya maheena aata hay, Bijli ka bill aa jaata hay
Halaankey Baadal bechaara ye bijli mufft Lutata hay
Phir hum ne apnay ghar Bijli....Kiyoo Badal se lagwaai nahi?
Ye baat samajh main aai nahi
>>
Agar Billi 'Shair' ki khala hay?...phir hum ne ussay kiyoon pala hay?
Kiya 'Shair' bohat nalaayak hay? Khala ko maar nikala hay?
Ya jungle ke Raja kay yahaan... kiya milti doodh malaai nahi?
Ye baat samajh main aai nahi
>>
Kiyoon Lambay baal hain bhaalu ke ? Kiyoon uss ki tind karai nahi?
Kiya 'woh' bhi Ganda bacha hay?.. ya uss ke Abbu,bhai nahi?
Yeh uss ka 'Hair Style' hay?..... ya Jungle main koi Naai nahi?
Ye baat samajh main aai nahi,
>>
Jo Taaray jagmag kartay hain, Kiya unn ki 'Chachi Taai' nahi?
Ho ga koi rishta sooraj se? ye baat humain batlaai nahi
Per Chanda kaisa mamoo hay? jab ammi ka woh 'bhai' nahi?
Ye baat samajh main aai nahi,
>>
Ye baat samajh main aai nahi, Aur Ammi ne samjhaai nahi
Main kesay meethi baat karoon? jab meethi cheez khai nahi
